لوحة محزنة

من طرف قيصر الإحساس السبت أغسطس 21, 2010 11:26 pm

لوحة مُحزنة

دخل شاب في مقتبل العمر.... يلبس بنطلون أسود وقميص رمادي ونعلات شبشب تعلوها كمية من التراب.. غير التراب الواضح في راسو..مما يدل على أنه جا من مسافة بعيدة وكداري.... قدم للوظيفة وهو يحلم بأن تكون من نصيبه...واستعد للمعاينة ... دخل على اللجنة المكونة من تلاتة رجال تبدو على سيماهم ملامح الراحة والدعة والترطيبة..واللحى والعمايم والجضيمات يتلاصفن....لو أخدت عينة بمسحة منديل ورق من جُضُم أي واحد وفحصت الكلويسترول والدهون الثلاثية لوجدته مرتفع في السما... عاين له رئيس اللجنة وبسمة صغيرة بدت على الزاوية اليمنى من فمه ولكنه أجهضها بسرعة جداً وقتلها في مكانها..نظر إلى الشاب المبشتن من فوق نضار ة القراية.قال ليهو بصوت تكسوهو نهرة:- إسمك منو - إسمي الزين عطا السيد - - أها يا الزين إنت داير تشتغل لشنو؟ - -داير أشتغل عشان آكل عيش - أهاااااا.. قمنا لي قلة الأدب من بدايتها... يعني إنت حسي ما ماكل عيش؟... وحسي تلقاك مجكِّس وداير تعرس وتلد.... هو زول ما لاقي ياكل عيش الجكيّس العليهو شنو؟....طيب يا الزين حافض كم جزء من القرآن؟ الزين:- حافض جزء عمّ... وجزء تبارك... رئيس اللجنة يسأله وتبدو على سيماه الدهشة المفتعلة:- بس؟؟؟ الزين- بس الرئيس:- عليك الله ما بتخجل!! زول طويل عريض جاي تطوطح وحافظ جزئين بس....؟ صمت طيب يا الزين....إنت كدي حسي أمشي أهلك واحفظ باقي القرآن وتعال..... يخرج الشاب مدلدل راسو ..... يكورك لو رئيس اللجنة ويقول ليهو:- برضو تعال حافظ الإنجيل والتوراة ... وتكوس لي للزبور سما واطا وتحفظو برضو وتجي..... سمح؟ ثم يستطرد ملتفتا لبقية اللجنة... زي دا حسي نوظفو لشنو؟؟ هو البلد دي المضيعها شنو غير النوع دا... ثم يدخل شاب آخر .... نحيل طويل يلبس ملابس نظيفة يغز سماعة موبايل في إضنيهو... يدخل وهو يتمختر .. يقف رئيس اللجنة ثم بقية الأعضاء للسلام عليه... وسؤاله عن أبوهو وأمو وحبوبتو وجدو وكل الأسرة الكريمة... ويردد الشاب بغنج بأنهم" تماااااام.... تماااااام"(علي الطراخ حنكوش) رئيس اللجنة:- يا ابني البلد عاقدة الأمل عليكم .. ومنتظرة منكم الكتير... أها ممكن تسمِّع لينا سورة الإخلاص؟ يعقد الشاب حاجبيه دهشة ويقول:- إخلاص سعد الله؟.... بتعرفها يا عمو؟.... والله يا عمو إنت ....ثم يغطي فمه بيده اليمنى مدارياً ضحكة..... يحنحن رئيس اللجنة وبسرعة جداً يقول له:- الله يجازيك.. بتريد الهزار زي أبوك...كدي سمِّع لنا سورة الحمدُ؟ يردد الشاب سورة الحمدُ بعد أن يطلِّع سماعة الموبايل من أضانو...ويغلط في آية... ويفُطها عديل كدي...فليحقو رئيس اللجنة ويصلح الغلط ويقول ليهو: عارفك حافظها كويس علا المشغولية يا ولدي.... مشاغل الدنيا كتيرة... خلاص أمشي يا ولدي وتعال الأسبوع الجايي واستلم شغلك... سلِّم علي أبوك عليك الله!
قفل الباب:-
حجر الزلط شن بقيسو الليلة دوبا دوبا والله بعيدة ميسو