تجربة زواج من بت مغتربين

من طرف الدسيس الخميس ديسمبر 02, 2010 4:41 am

في واحد مغترب قرر ان يتزوج ، وبالتحديد حاجة جاهزة من هنا ، لانو بينو وبين
نفسه قال بلا استقدام بلا تعب ، وقال انو شايف لواتزوج بت مغتربين حايرتاح
من حياة العزوبية والبهدلة والجري في المطاعم ومحلات الوجبات السريعة.
الشي التاني تكون جنبو وقريبة زولك فتش جاي وجاي لقي ليو بت مغتربين
قام طوالي اتقدم لاهلها وطوالي بعد شهر عمل العرس .
وزلك عايش شهر العسل و فرحان بدخول القفص الذهبي ومبسوط للاخر .
انتهي شهر العسل ونزل الشغل ، وجاء البيت مع نهاية الدوام يمني نفسه
باكلة شهية .
الا انه وجد الوضع مختلف ، البت العروس نايمة والريموت في يدها، قال ما معقول
اصحيها من النوم اروح اجيب الغداء من المطعم ، راح ورجع بالاكل ولسه الزولة نايمة
انتظر هو شويه وصحت هي من النوم ولقت الاكل جاهز واتغدت تمام واخينا ما سالها
ولا فاتحها في موضوع الطبخ ، بس قال ليها : عايز شاي ممكن ؟؟
ردت ، والله معليش تري انا اليوم مرررة مصدعة ، زولك قام بنفسه وظبط الشاي
وشرب وراح الشغل ،تاني يوم اتصل عليها من بدري وهو في الدوام ، عشان ينبهها
لموضوع العضة ، جرس التلفون يرن ومافي رد ، عاود الاتصال ، ردت عليه وهي صاحية
من النوم بصوت مبحوح ، جيب معاك كبسة وبطاطس ،، لاتنسي هااا.
المهم الزوج رجع من العمل ومعاه الغداء، وبعد الغداء فاتحها في موضوع الطبخ والاكل
وانو دا من واجبات المراة ومسئوليتهاوانها لازم تتعود تطبخ وكدا..
وكان ردها... بس انا ما اعرف اطبخ ، ماما هي اللي تطبخ لنا وانا عمري مادخلت المطبخ
زولك مرت عليو شهور بالحالة دي وكره العيشة وقال ياريتني كنت عزابي
المهم صاحبنا قرر انو يسافر للسودان في اجازة الصيف .
الا ان الزوجة بدات تتزمر وقالت بغنج ودلال .. ايش ايش انا مااروح السودان رح انت بنفسك
سالها عن السبب ، قالت : هناك الجو مررة حار ولا في مكيفات ولا شي والكهرباء
اسمع يقولوا بتقطع والغبار والحر ، وبعدين تري ماني اقدر اتحمل الحر وبشرتي ماتحتمل
الشي الثاني الامراض ومافي علاج ولافي الهلال الاحمر ولا اسعافات اولية .
وهناك يقولو في سوء تغذية ، وانا مش متعودة علي الاكل هناك ممكن يسبب لي
اضطرابات لانو هناك لافي البيك ولاكنتاكي ولا ماكدونالدز .
غير كده تري المويه هناك مررة مو صحية وانا ما اقدر اشرب مويه البزبوز الملوثة
زولك فلس تب وغلبتو الحيلة معاها ، واحتار وحير دليلو معاو ، وسابها وراح السودان
وهي قعدت مع اهلها حتي يعود .